Na sīsappacālakaṁ antaraghare nisīditabbaṁ. Sīsaṁ paggahetvā nisīditabbaṁ. Yo anādariyaṁ paṭicca sīsappacālakaṁ antaraghare nisīdati sīsaṁ olambento, āpatti dukkaṭassa. Anāpatti— asañcicca, assatiyā, ajānantassa, gilānassa, vāsūpagatassa, āpadāsu, ummattakassa, ādikammikassāti. Dasamasikkhāpadaṁ niṭṭhitaṁ. Ujjagghikavaggo dutiyo. Theravāda Vinaya

21. Khambhakatasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū khambhakatā antaraghare gacchanti …pe…. “Na khambhakato antaraghare gamissāmīti sikkhā karaṇīyā”ti. Na khambhakatena antaraghare gantabbaṁ. Yo anādariyaṁ paṭicca ekato vā ubhato vā khambhaṁ katvā antaraghare gacchati, āpatti dukkaṭassa. Anāpatti— asañcicca …pe… ādikammikassāti. Paṭhamasikkhāpadaṁ niṭṭhitaṁ. Theravāda Vinaya

22. Dutiyakhambhakatasikkhāpada

Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū khambhakatā antaraghare nisīdanti …pe…. “Na khambhakato antaraghare nisīdissāmīti sikkhā karaṇīyā”ti.