พระไตรปิฎก › บาลีโรมัน (มหาสังคีติ) › เล่ม ๔๑ › หน้า ๒๘๘
ปัฏฐาน ภาค ๒
บาลีโรมัน (มหาสังคีติ) · เล่ม ๔๑ · หน้า ๒๘๘
เข้าสู่ระบบเพื่อคั่นหน้า

Bhāvanāya pahātabbahetuko dhammo bhāvanāya pahātabbahetukassa dhammassa ārammaṇapaccayena paccayo—bhāvanāya pahātabbahetukaṁ rāgaṁ assādeti abhinandati; taṁ ārabbha bhāvanāya pahātabbahetuko rāgo uppajjati, uddhaccaṁ uppajjati, bhāvanāya pahātabbahetukaṁ domanassaṁ uppajjati. Uddhaccaṁ ārabbha uddhaccaṁ uppajjati, bhāvanāya pahātabbahetukaṁ domanassaṁ uppajjati. Bhāvanāya pahātabbahetukaṁ domanassaṁ ārabbha bhāvanāya pahātabbahetukaṁ domanassaṁ uppajjati, uddhaccaṁ uppajjati. Bhāvanāya pahātabbahetuko dhammo dassanena pahātabbahetukassa dhammassa ārammaṇapaccayena paccayo—bhāvanāya pahātabbahetukaṁ rāgaṁ assādeti abhinandati; taṁ ārabbha dassanena pahātabbahetuko rāgo uppajjati, diṭṭhi uppajjati, vicikicchā uppajjati, dassanena pahātabbahetukaṁ domanassaṁ uppajjati. Uddhaccaṁ ārabbha diṭṭhi uppajjati, vicikicchā uppajjati, dassanena pahātabbahetukaṁ domanassaṁ uppajjati. Bhāvanāya pahātabbahetukaṁ domanassaṁ ārabbha dassanena pahātabbahetukaṁ domanassaṁ uppajjati, diṭṭhi uppajjati, vicikicchā uppajjati.