Noupādānaṁ kusalaṁ dhammaṁ paṭicca noupādāno kusalo dhammo uppajjati hetupaccayā. (Saṅkhittaṁ.) Hetuyā ekaṁ, ārammaṇe ekaṁ …pe… avigate ekaṁ. (Saṅkhittaṁ.) (Sahajātavārepi …pe… pañhāvārepi sabbattha ekaṁ.) Upādānaṁ akusalaṁ dhammaṁ paṭicca upādāno akusalo dhammo uppajjati hetupaccayā. Upādānaṁ akusalaṁ dhammaṁ paṭicca noupādāno akusalo dhammo uppajjati hetupaccayā. Upādānaṁ akusalaṁ dhammaṁ paṭicca upādāno akusalo ca noupādāno akusalo ca dhammā uppajjanti hetupaccayā. Noupādānaṁ akusalaṁ dhammaṁ paṭicca noupādāno akusalo dhammo uppajjati hetupaccayā … tīṇi. Upādānaṁ akusalañca noupādānaṁ akusalañca dhammaṁ paṭicca upādāno akusalo dhammo uppajjati hetupaccayā … tīṇi. (Saṅkhittaṁ.) Hetuyā nava, ārammaṇe nava (sabbattha nava), avigate nava. (Saṅkhittaṁ.)