Hetuyā nava, ārammaṇe nava, adhipatiyā nava …pe… kamme nava, vipāke nava …pe… avigate nava. (Saṅkhittaṁ.) Naadhipati Hetuṁ avitakkavicāramattaṁ dhammaṁ paṭicca hetu avitakkavicāramatto dhammo uppajjati naadhipatipaccayā. (Saṅkhittaṁ.) Naadhipatiyā nava, napurejāte nava, napacchājāte nava, naāsevane nava, nakamme tīṇi, navipāke nava, navippayutte nava. (Saṅkhittaṁ.) Hetupaccayā naadhipatiyā nava. (Saṅkhittaṁ.) Naadhipatipaccayā hetuyā nava. (Saṅkhittaṁ.) (Sahajātavāropi paccayavāropi nissayavāropi saṁsaṭṭhavāropi sampayuttavāropi paṭiccavārasadisā vitthāretabbā.) Hetvādi Hetu avitakkavicāramatto dhammo hetussa avitakkavicāramattassa dhammassa hetupaccayena paccayo … tīṇi. Hetu avitakkavicāramatto dhammo nahetussa avitakkavicāramattassa dhammassa ārammaṇapaccayena paccayo … tīṇi. Hetu avitakkavicāramatto dhammo hetussa avitakkavicāramattassa dhammassa adhipatipaccayena paccayo—sahajātādhipati … tīṇi. Nahetu avitakkavicāramatto dhammo nahetussa avitakkavicāramattassa dhammassa adhipatipaccayena paccayo—ārammaṇādhipati, sahajātādhipati … tīṇi.