ขุททกนิกาย วิมาน-เปตวัตถุ-เถรคาถา-เถรีคาถา บาลีสยามรัฐ · เล่ม ๒๖ · หน้า ๓๘๘ · ข้อ 392 ก− ก ก+ อ่านออกเสียง หยุดอ่าน เข้าสู่ระบบเพื่อคั่นหน้า [๓๙๒] ๘ คจฺฉํ วเทสิ สมณ ฐิโตมฺหิ มมญฺจ พฺรูสิ ฐิตมฏฺฐิโตติ ปุจฺฉามิ ตํ สมณ เอตมตฺถํ กสฺมา ฐิโต ตฺวํ อหมฏฺฐิโตมฺหิ ฯ ฐิโต อหํ องฺคุลิมาล สพฺพทา สพฺเพสุ ภูเตสุ นิธาย ทณฺฑํ ตุวญฺจ ปาเณสุ อสญฺญโตสิ ตสฺมา ฐิโตหํ ตุวมฏฺฐิโตสิ ฯ จิรสฺสํ วต เม มหิโต มเหสิ มหาวนํ สมโณ ปจฺจุปาทิ โสหํ จชิสฺสามิ สหสฺสปาปํ สุตฺวาน คาถํ ตว ธมฺมยุตฺตํ ฯ อิจฺเจว โจโร อสิมาวุธญฺจ โสพฺเภ ปปาเต นรเก อนฺวกาสิ อวนฺทิ โจโร สุคตสฺส ปาเท ตตฺเถว ปพฺพชฺชมยาจิ พุทฺธํ ฯ พุทฺโธ จ โข การุณิโก มเหสิ โย สตฺถา โลกสฺส สเทวกสฺส ตเมหิ ภิกฺขูติ ตทา อโวจ เอเสว ตสฺส อหุ ภิกฺขุภาโว ฯ ← หน้า ๓๘๗ หน้า ๓๘๙ →
