อิตฺถํ สุทํ อายสฺมา ตมาลปุปฺผิโย เถโร อิมา คาถาโย อภาสิตฺถาติ ฯ

ตมาลปุปฺผิยตฺเถรสฺส อปทานํ สมตฺตํ ฯ

ทุติยํ ติณสนฺถารทายกตฺเถราปทานํ (๑๙๒)

[๑๙๔] ยทา ๑ วนวาสิโก อิสิ ติณํ ลายามิ สตฺถุโน

สพฺเพ ปทกฺขิณาวตฺตา ปฐพฺยา นิปตึสุ เต ฯ

ตมหํ ติณมาทาย สนฺถรึ ธรณิมุตฺตเม

ตีเณว ๒ ตาลปตฺตานิ อาหริตฺวานหํ ตทา ฯ

ติทณฺเฑ ๓ ฉทนํ กตฺวา สิทฺธตฺถสฺส อทาสหํ

สตฺตาหํ ธารยุํ ตตฺถ ๔ เทวมานุส สตฺถุโน ฯ

จตุนวุเต อิโต กปฺเป ยํ ติณํ อททึ ตทา

ทุคฺคตึ นาภิชานามิ ติณทานสฺสิทํ ผลํ ฯ

ปญฺจสฏฺฐิมฺหิโต กปฺเป จตฺตาโรสุํ มหทฺธนา

สตฺตรตนสมฺปนฺนา จกฺกวตฺตี มหพฺพลา ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา ติณสนฺถารทายโก เถโร อิมา คาถาโย อภาสิตฺถาติ ฯ

ติณสนฺถารทายกตฺเถรสฺส อปทานํ สมตฺตํ ฯ #๑ ม. ยทา วนวาสึ อิสิ ติณํ ลายติ สตฺถุโน ฯ ยุ. ยํ ... ฯ #๒ ยุ. ตีเณ จ ฯ ๓ ม. ติเณสุ ... ฯ ยุ. ตํ ติณํ ... ฯ ๔ ม. ตสฺส ฯ