อิตฺถํ สุทํ อายสฺมา ภิสาลุวทายโก เถโร อิมา คาถาโย อภาสิตฺถาติ ฯ

ภิสาลุวทายกตฺเถรสฺส อปทานํ สมตฺตํ ฯ

ฉฏฺฐมํ ภาณวารํ ฯ

ปญฺจมํ เอกสญฺญกตฺเถราปทานํ (๗๕)

[๗๗] ขณฺโฑ นามาสิ นาเมน วิปสฺสิสฺสคฺคสาวโก

เอกา ภิกฺขา มยา ทินฺนา โลกาหุติปฏิคฺคโห ๑ ฯ

เตน จิตฺตปฺปสาเทน ทิปทินฺท นราสภ

ทุคฺคตึ นาภิชานามิ เอกภิกฺขายิทํ ผลํ ฯ

จตฺตาฬีเส อิโต กปฺเป วรุโณ นาม ขตฺติโย

สตฺตรตนสมฺปนฺโน จกฺกวตฺติ มหพฺพโล ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา เอกสญฺญโก เถโร อิมา คาถาโย อภาสิตฺถาติ ฯ

เอกสญฺญกตฺเถรสฺส อปทานํ สมตฺตํ ฯ

ฉฏฺฐํ ติณสนฺถารทายกตฺเถราปทานํ (๗๖)

[๗๘] หิมวนฺตสฺส อวิทูเร มหาชาตสฺสโร อหุ

สตฺตปตฺเตหิ สญฺฉนฺโน นานาสกุณมาลโย ฯ #๑ ม. โลกาหุติปฏิคฺคเห ฯ