Tattha katamaṁ āyakosallaṁ? “Ime dhamme manasikaroto anuppannā ceva akusalā dhammā na uppajjanti, uppannā ca akusalā dhammā pahīyanti. Ime vā panime dhamme manasikaroto anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya bhāvanāya pāripūriyā saṁvattantī”ti— yā tattha paññā pajānanā …pe… amoho dhammavicayo sammādiṭṭhi— idaṁ vuccati “āyakosallaṁ”. Tattha katamaṁ apāyakosallaṁ? “Ime dhamme manasikaroto anuppannā ceva kusalā dhammā na uppajjanti, uppannā ca kusalā dhammā nirujjhanti. Ime vā panime dhamme manasikaroto anuppannā ceva akusalā dhammā uppajjanti, uppannā ca akusalā dhammā bhiyyobhāvāya vepullāya saṁvattantī”ti— yā tattha paññā pajānanā …pe… amoho dhammavicayo sammādiṭṭhi— idaṁ vuccati “apāyakosallaṁ”. Sabbāpi tatrupāyā paññā upāyakosallaṁ. Catūsu bhūmīsu vipāke paññā vipākā paññā. Catūsu bhūmīsu kusale paññā vipākadhammadhammā paññā. Tīsu bhūmīsu kiriyābyākate paññā nevavipākanavipākadhammadhammā paññā. Tīsu bhūmīsu vipāke paññā upādinnupādāniyā paññā. Tīsu bhūmīsu kusale tīsu bhūmīsu kiriyābyākate paññā anupādinnupādāniyā paññā. Catūsu maggesu catūsu phalesu paññā anupādinnaanupādāniyā paññā. Vitakkavicārasampayuttā paññā savitakkasavicārā paññā. Vitakkavippayuttā vicārasampayuttā paññā avitakkavicāramattā paññā. Vitakkavicāravippayuttā paññā avitakkaavicārā paññā. Pītisampayuttā paññā pītisahagatā paññā.