Tattha katamo avijjāpaccayā saṅkhāro? Yā cetanā sañcetanā sañcetayitattaṁ— ayaṁ vuccati “avijjāpaccayā saṅkhāro”. Tattha katamaṁ saṅkhārapaccayā viññāṇaṁ? Yaṁ cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu— idaṁ vuccati “saṅkhārapaccayā viññāṇaṁ”. Tattha katamaṁ viññāṇapaccayā nāmaṁ? Vedanākkhandho, saññākkhandho, saṅkhārakkhandho— idaṁ vuccati “viññāṇapaccayā nāmaṁ”. Tattha katamaṁ nāmapaccayā chaṭṭhāyatanaṁ? Yaṁ cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu— idaṁ vuccati “nāmapaccayā chaṭṭhāyatanaṁ”. Tattha katamo chaṭṭhāyatanapaccayā phasso? Yo phasso phusanā samphusanā samphusitattaṁ— ayaṁ vuccati “chaṭṭhāyatanapaccayā phasso”. Tattha katamā phassapaccayā vedanā? Yaṁ cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā— ayaṁ vuccati “phassapaccayā vedanā”. Tattha katamā vedanāpaccayā taṇhā? Yo rāgo sārāgo anunayo anurodho nandī nandirāgo cittassa sārāgo— ayaṁ vuccati “vedanāpaccayā taṇhā”.