Upapattesiyena cittena samuṭṭhito phasso upapattesiye citte bhijjamāne anavaseso bhijjatīti? Āmantā. Upapattesiyena cittena samuṭṭhitaṁ jīvitindriyaṁ upapattesiye citte bhijjamāne anavasesaṁ bhijjatīti? Na hevaṁ vattabbe …pe…. Dve jīvitindriyānīti? Āmantā. Dvīhi jīvitehi jīvati, dvīhi maraṇehi mīyatīti? Āmantā. Jīvitindriyakathā niṭṭhitā. Mahāpaṇṇāsaka Aṭṭhamavagga Kammahetukathā Kammahetu arahā arahattā parihāyatīti? Āmantā. Kammahetu sotāpanno sotāpattiphalā parihāyatīti? Na hevaṁ vattabbe …pe… kammahetu arahā arahattā parihāyatīti? Āmantā. Kammahetu sakadāgāmī …pe… anāgāmī anāgāmiphalā parihāyatīti? Na hevaṁ vattabbe …pe…. Kammahetu sotāpanno sotāpattiphalā na parihāyatīti? Āmantā. Kammahetu arahā arahattā na parihāyatīti? Na hevaṁ vattabbe …pe… kammahetu sakadāgāmī …pe… anāgāmī anāgāmiphalā na parihāyatīti? Āmantā. Kammahetu arahā arahattā na parihāyatīti? Na hevaṁ vattabbe …pe….