Na vattabbaṁ— “nivuto nīvaraṇaṁ jahatī”ti? Āmantā. Nanu vuttaṁ bhagavatā— “tassa evaṁ jānato evaṁ passato kāmāsavāpi cittaṁ vimuccati …pe… avijjāsavāpi cittaṁ vimuccatī”ti. Attheva suttantoti? Āmantā. Tena hi nivuto nīvaraṇaṁ jahatīti. Nivutakathā niṭṭhitā. Mahāpaṇṇāsaka Terasamavagga Sammukhībhūtakathā Sammukhībhūto saṁyojanaṁ jahatīti? Āmantā. Ratto rāgaṁ jahati, duṭṭho dosaṁ jahati, mūḷho mohaṁ jahati, kiliṭṭho kilese jahatīti? Na hevaṁ vattabbe …pe… rāgena rāgaṁ jahati, dosena dosaṁ jahati, mohena mohaṁ jahati, kilesehi kilese jahatīti? Na hevaṁ vattabbe …pe… Rāgo cittasampayutto, maggo cittasampayuttoti? Āmantā. Dvinnaṁ phassānaṁ …pe… dvinnaṁ cittānaṁ samodhānaṁ hotīti? Na hevaṁ vattabbe …pe… rāgo akusalo, maggo kusaloti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṁ āgacchantīti? Na hevaṁ vattabbe …pe….