Atītāni bāvīsatindriyāni atīto addhā, anāgatāni bāvīsatindriyāni anāgato addhā, paccuppannāni bāvīsatindriyāni paccuppanno addhāti? Āmantā. Chasaṭṭhi addhāti? Na hevaṁ vattabbe …pe…. Na vattabbaṁ— “addhā parinipphanno”ti? Āmantā. Nanu vuttaṁ bhagavatā— “tīṇimāni, bhikkhave, kathāvatthūni. Katamāni tīṇi? Atītaṁ vā, bhikkhave, addhānaṁ ārabbha kathaṁ katheyya— ‘evaṁ ahosi atītamaddhānan’ti; anāgataṁ vā, bhikkhave, addhānaṁ ārabbha kathaṁ katheyya— ‘evaṁ bhavissati anāgatamaddhānan’ti; etarahi vā, bhikkhave, paccuppannaṁ addhānaṁ ārabbha kathaṁ katheyya— ‘evaṁ hoti etarahi paccuppannan’ti. Imāni kho, bhikkhave, tīṇi kathāvatthūnī”ti. Attheva suttantoti? Āmantā. Tena hi addhā parinipphannoti. Addhākathā niṭṭhitā. Mahāpaṇṇāsaka Pannarasamavagga Khaṇalayamuhuttakathā Khaṇo parinipphanno, layo parinipphanno, muhuttaṁ parinipphannanti? Āmantā. Rūpanti? Na hevaṁ vattabbe …pe… vedanā … saññā … saṅkhārā … viññāṇanti? Na hevaṁ vattabbe …pe….