Na vattabbaṁ— “puggalo upalabbhati saccikaṭṭhaparamatthenā”ti? Āmantā. Nanu yo suṇāti …pe… yo ghāyati … yo sāyati … yo phusati … yo vijānāti yaṁ vijānāti yena vijānāti, so vijānāti taṁ vijānāti tena vijānātīti? Āmantā. Hañci yo vijānāti yaṁ vijānāti yena vijānāti, so vijānāti taṁ vijānāti tena vijānāti; tena vata re vattabbe— “puggalo upalabbhati saccikaṭṭhaparamatthenā”ti. Puggalo upalabbhati saccikaṭṭhaparamatthenāti? Āmantā. Nanu yo na passati yaṁ na passati yena na passati, so na passati taṁ na passati tena na passatīti? Āmantā. Hañci yo na passati yaṁ na passati yena na passati, so na passati taṁ na passati tena na passati; no ca vata re vattabbe— “puggalo upalabbhati saccikaṭṭhaparamatthenā”ti. Puggalo upalabbhati saccikaṭṭhaparamatthenāti? Āmantā. Nanu yo na suṇāti …pe… yo na ghāyati … yo na sāyati … yo na phusati … yo na vijānāti yaṁ na vijānāti yena na vijānāti, so na vijānāti taṁ na vijānāti tena na vijānātīti? Āmantā. Hañci yo na vijānāti yaṁ na vijānāti yena na vijānāti, so na vijānāti taṁ na vijānāti tena na vijānāti; no ca vata re vattabbe— “puggalo upalabbhati saccikaṭṭhaparamatthenā”ti. Na vattabbaṁ— “puggalo upalabbhati saccikaṭṭhaparamatthenā”ti? Āmantā. Nanu vuttaṁ bhagavatā— “passāmahaṁ, bhikkhave, dibbena cakkhunā visuddhena atikkantamānusakena satte cavamāne upapajjamāne hīne paṇīte suvaṇṇe dubbaṇṇe, sugate duggate yathākammūpage satte pajānāmī”ti. Attheva suttantoti? Āmantā. Tena hi puggalo upalabbhati saccikaṭṭhaparamatthenāti.