เอกปญฺญาสิโต กปฺเป วรุโณ ๑ เทวสวฺหโย

สตฺตรตนสมฺปนฺโน จกฺกวตฺติ มหพฺพโล ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา สยนทายโก เถโร อิมา คาถาโย อภาสิตฺถาติ ฯ

สยนทายกตฺเถรสฺส อปทานํ สมตฺตํ ฯ

อฏฺฐมํ จงฺกมทายกตฺเถราปทานํ (๔๘)

[๕๐] อตฺถทสฺสิสฺส มุนิโน โลกเชฏฺฐสฺส ตาทิโน

อิฏฺฐกาหิ จินิตฺวาน จงฺกมํ การยึ อหํ ฯ

อุจฺจโต ปญฺจรตนํ จงฺกมํ สาธุ มาปิตํ

อายามโต หตฺถสตํ ภาวเนยฺยํ มโนรมํ ฯ

ปฏิคฺคเหสิ ภควา อตฺถทสฺสี นรุตฺตโม

หตฺเถน ปุฬินํ คยฺห อิมา คาถา อภาสถ ฯ

อิมินา ปุฬินทาเนน จงฺกมํ สุกเตน จ

สตฺตรตนสมฺปนฺนํ ปุฬินํ อนุโภสฺสติ ฯ

ตีณิ กปฺปานิ เทเวสุ เทวรชฺชํ กริสฺสติ

อนุโภสฺสติ สมฺปตฺตึ อจฺฉราหิ ปุรกฺขโต ฯ #๑ ม. วรโก ฯ