อิตฺถํ สุทํ อายสฺมา คตสญฺญโก เถโร อิมา คาถาโย อภาสิตฺถาติ ฯ
คตสญฺญกตฺเถรสฺส อปทานํ สมตฺตํ ฯ
จตุตฺถํ สตฺตปทุมิยตฺเถราปทานํ (๓๑๔)
[๓๑๖] นทีกูเล วสามหํ เนสาโท นาม พฺราหฺมโณ
สตฺตปตฺเตหิ ปุปฺเผหิ สมฺมชฺชิตฺวาน อสฺสมํ ฯ
สุวณฺณวณฺณํ สมฺพุทฺธํ สิทฺธตฺถํ โลกนายกํ
ทิสฺวา วเนน ๑ คจฺฉนฺตํ หาโส เม อุปปชฺชถ ฯ
ปจฺจุคฺคนฺตฺวาน สมฺพุทฺธํ โลกเชฏฺฐํ นราสภํ
อสฺสมํ อตินาเมตฺวา ชลชคฺเคหิ โอกิรึ ฯ
จตุนวุเต อิโต กปฺเป ยํ ปุปฺผมภิปูชยึ
ทุคฺคตึ นาภิชานามิ พุทฺธปูชายิทํ ผลํ ฯ
อิโต เต สตฺตเม กปฺเป จตุโร ปาทปาวรา
สตฺตรตนสมฺปนฺนา จกฺกวตฺตี มหพฺพลา ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา สตฺตปทุมิโย เถโร อิมา คาถาโย อภาสิตฺถาติ ฯ
สตฺตปทุมิยตฺเถรสฺส อปทานํ สมตฺตํ ฯ
#๑ ม. นเภน ฯ