ทฺวาวีสติโม กุกฺกุสนฺธพุทฺธวํโส ๑

[๒๓] เวสฺสภุสฺส อปเรน สมฺพุทฺโธ ทิปทุตฺตโม

กุกฺกุสนฺโธ นาม นาเมน อปฺปเมยฺโย ทุราสโท ฯ

อุคฺฆาเฏตฺวา สพฺพภวํ จริยาย ปารมิงฺคโต

สีโหว ปญฺชรํ เภตฺวา ปตฺโต สมฺโพธิมุตฺตมํ ฯ

ธมฺมจกฺกํ ปวตฺเตนฺเต กุกฺกุสนฺเธ โลกนายเก

จตฺตาฬีสโกฏิสหสฺสานํ ปฐมาภิสมโย อหุ ฯ

อนฺตลิกฺขมฺหิ อากาเส ยมกํ กตฺวา วิกุพฺพนํ

ตึสโกฏิสหสฺสานํ โพเธสิ เทวมานุเส ฯ

นรเทวสฺส ยกฺขสฺส จตุสจฺจปฺปกาสเน

ธมฺมาภิสมโย ตสฺส คณนาโต อสงฺขิโย ฯ

กุกฺกุสนฺธสฺส ภควโต เอโก อาสิ สมาคโม

ขีณาสวานํ วิมลานํ สนฺตจิตฺตาน ตาทินํ ฯ

จตฺตาฬีสสหสฺสานํ ตทา อาสิ สมาคโม

ทนฺตภูมิมนุปฺปตฺตานํ อาสวาทิคณกฺขยา ฯ

อหนฺเตน สมเยน เขโม นามาสิ ขตฺติโย

ตถาคเต ชินปุตฺเต ทานํ ทตฺวา อนปฺปกํ ฯ

ปตฺตญฺจ จีวรํ ทตฺวา อญฺชนํ มธุลฏฺฐิกํ

อิเมตํ ปตฺถิตํ สพฺพํ ปฏิยาเทมิ วรํ วรํ ฯ #๑ ม. ยุ. กกุสนฺธ ... ฯ สพฺพตฺถ อีทิสเมว ฯ