Imā catasso bhāvanā rūpaṁ passanto bhāveti, vedanaṁ passanto bhāveti, saññaṁ passanto bhāveti, saṅkhāre passanto bhāveti, viññāṇaṁ passanto bhāveti, cakkhuṁ …pe… jarāmaraṇaṁ …pe… amatogadhaṁ nibbānaṁ pariyosānaṭṭhena passanto bhāveti. Ye ye dhammā bhāvitā honti te te dhammā ekarasā honti. Taṁ ñātaṭṭhena ñāṇaṁ, pajānanaṭṭhena paññā. Tena vuccati— “ime dhammā bhāvetabbāti sotāvadhānaṁ, taṁpajānanā paññā sutamaye ñāṇan”ti. [4] Bhāvetabbaniddeso. Catutthabhāṇavāro. Kathaṁ “ime dhammā sacchikātabbā”ti sotāvadhānaṁ, taṁpajānanā paññā sutamaye ñāṇaṁ? Eko dhammo sacchikātabbo— akuppā cetovimutti. Dve dhammā sacchikātabbā— vijjā ca vimutti ca. Tayo dhammā sacchikātabbā— tisso vijjā. Cattāro dhammā sacchikātabbā— cattāri sāmaññaphalāni. Pañca dhammā sacchikātabbā— pañca dhammakkhandhā. Cha dhammā sacchikātabbā— cha abhiññā. Satta dhammā sacchikātabbā— satta khīṇāsavabalāni. Aṭṭha dhammā sacchikātabbā— aṭṭha vimokkhā. Nava dhammā sacchikātabbā— nava anupubbanirodhā. Dasa dhammā sacchikātabbā— dasa asekkhā dhammā.