Abyākato dhammo abyākatassa dhammassa vippayuttapaccayena paccayo—sahajātaṁ, purejātaṁ, pacchājātaṁ. <b>Sahajātā</b>—vipākābyākatā kiriyābyākatā khandhā cittasamuṭṭhānānaṁ rūpānaṁ vippayuttapaccayena paccayo. Paṭisandhikkhaṇe vipākābyākatā khandhā kaṭattārūpānaṁ vippayuttapaccayena paccayo. Khandhā vatthussa vippayuttapaccayena paccayo. Vatthu khandhānaṁ vippayuttapaccayena paccayo. <b>Purejātaṁ</b>—cakkhāyatanaṁ cakkhuviññāṇassa vippayuttapaccayena paccayo. Sotāyatanaṁ sotaviññāṇassa vippayuttapaccayena paccayo. Ghānāyatanaṁ ghānaviññāṇassa vippayuttapaccayena paccayo. Jivhāyatanaṁ jivhāviññāṇassa vippayuttapaccayena paccayo. Kāyāyatanaṁ kāyaviññāṇassa vippayuttapaccayena paccayo. Vatthu vipākābyākatānaṁ kiriyābyākatānaṁ khandhānaṁ vippayuttapaccayena paccayo. <b>Pacchājātā</b>—vipākābyākatā kiriyābyākatā khandhā purejātassa imassa kāyassa vippayuttapaccayena paccayo. Abyākato dhammo kusalassa dhammassa vippayuttapaccayena paccayo. <b>Purejātaṁ</b>—vatthu kusalānaṁ khandhānaṁ vippayuttapaccayena paccayo. Abyākato dhammo akusalassa dhammassa vippayuttapaccayena paccayo. <b>Purejātaṁ</b>—vatthu akusalānaṁ khandhānaṁ vippayuttapaccayena paccayo. Atthi Kusalo dhammo kusalassa dhammassa atthipaccayena paccayo—kusalo eko khandho tiṇṇannaṁ khandhānaṁ atthipaccayena paccayo. Tayo khandhā ekassa khandhassa atthipaccayena paccayo. Dve khandhā dvinnaṁ khandhānaṁ atthipaccayena paccayo. Kusalo dhammo abyākatassa dhammassa atthipaccayena paccayo—sahajātaṁ, pacchājātaṁ. <b>Sahajātā</b>—kusalā khandhā cittasamuṭṭhānānaṁ rūpānaṁ atthipaccayena paccayo. <b>Pacchājātā</b>—kusalā khandhā purejātassa imassa kāyassa atthipaccayena paccayo.