<b>Pakatūpanissayo</b>—sukhāya vedanāya sampayuttaṁ saddhaṁ upanissāya attānaṁ ātāpeti paritāpeti, pariyiṭṭhimūlakaṁ dukkhaṁ paccanubhoti. Sukhāya vedanāya sampayuttaṁ sīlaṁ … sutaṁ … cāgaṁ … paññaṁ upanissāya attānaṁ ātāpeti paritāpeti, pariyiṭṭhimūlakaṁ dukkhaṁ paccanubhoti. Sukhāya vedanāya sampayuttaṁ rāgaṁ … mohaṁ … mānaṁ … diṭṭhiṁ … patthanaṁ … sukhasahagataṁ kāyaviññāṇaṁ upanissāya pāṇaṁ hanati. Dukkhāya vedanāya sampayuttena cittena adinnaṁ ādiyati, musā bhaṇati, pisuṇaṁ bhaṇati, pharusaṁ bhaṇati, samphaṁ palapati, sandhiṁ chindati, nillopaṁ harati, ekāgārikaṁ karoti, paripanthe tiṭṭhati, paradāraṁ gacchati, gāmaghātaṁ karoti, nigamaghātaṁ karoti, mātaraṁ jīvitā voropeti, pitaraṁ jīvitā voropeti, arahantaṁ jīvitā voropeti, duṭṭhena cittena tathāgatassa lohitaṁ uppādeti, saṅghaṁ bhindati. Sukhāya vedanāya sampayuttā saddhā … sīlaṁ … sutaṁ … cāgo … paññā … rāgo … moho … māno … diṭṭhi … patthanā … sukhasahagataṁ kāyaviññāṇaṁ dosassa … mohassa … dukkhasahagatassa kāyaviññāṇassa … dukkhāya vedanāya sampayuttakānaṁ khandhānaṁ upanissayapaccayena paccayo. Sukhāya vedanāya sampayutto dhammo adukkhamasukhāya vedanāya sampayuttassa dhammassa upanissayapaccayena paccayo—ārammaṇūpanissayo, anantarūpanissayo, pakatūpanissayo …pe….