Nocitto dhammo cittassa ca nocittassa ca dhammassa ārammaṇapaccayena paccayo— dānaṁ datvā …pe… (paṭhamagamanasadisaṁ ninnānākaraṇaṁ, imaṁ nānaṁ), rūpāyatanaṁ cakkhuviññāṇassa sampayuttakānañca khandhānaṁ …pe… phoṭṭhabbāyatanaṁ kāyaviññāṇassa sampayuttakānañca khandhānaṁ …pe… nocittā khandhā iddhividhañāṇassa …pe… āvajjanāya ārammaṇapaccayena paccayo. Citto ca nocitto ca dhammā cittassa dhammassa ārammaṇapaccayena paccayo— cittañca sampayuttake ca khandhe ārabbha cittaṁ uppajjati … tīṇi. Adhipati Citto dhammo cittassa dhammassa adhipatipaccayena paccayo. <b>Ārammaṇādhipati</b>—cittaṁ garuṁ katvā cittaṁ uppajjati. Citto dhammo nocittassa dhammassa adhipatipaccayena paccayo—ārammaṇādhipati, sahajātādhipati. <b>Ārammaṇādhipati</b>—cittaṁ garuṁ katvā nocittā khandhā uppajjanti. <b>Sahajātādhipati</b>—cittādhipati sampayuttakānaṁ khandhānaṁ cittasamuṭṭhānānañca rūpānaṁ adhipatipaccayena paccayo. Citto dhammo cittassa ca nocittassa ca dhammassa adhipatipaccayena paccayo. <b>Ārammaṇādhipati</b>—cittaṁ garuṁ katvā cittañca sampayuttakā ca khandhā uppajjanti.