Avitakkaṁ dhammaṁ paccayā avitakko dhammo uppajjati hetupaccayā—avitakkaṁ ekaṁ khandhaṁ paccayā tayo khandhā cittasamuṭṭhānañca rūpaṁ …pe… dve khandhe …pe… vitakkaṁ paccayā cittasamuṭṭhānaṁ rūpaṁ; paṭisandhikkhaṇe avitakkaṁ ekaṁ khandhaṁ paccayā tayo khandhā kaṭattā ca rūpaṁ …pe… dve khandhe …pe… paṭisandhikkhaṇe vitakkaṁ paccayā kaṭattārūpaṁ, khandhe paccayā vatthu, vatthuṁ paccayā khandhā, vitakkaṁ paccayā vatthu, vatthuṁ paccayā vitakko, ekaṁ mahābhūtaṁ paccayā tayo mahābhūtā …pe… vatthuṁ paccayā avitakkā khandhā, vatthuṁ paccayā vitakko. Avitakkaṁ dhammaṁ paccayā savitakko dhammo uppajjati hetupaccayā—vitakkaṁ paccayā sampayuttakā khandhā, vatthuṁ paccayā savitakkā khandhā. (Paṭisandhiyāpi dve.) Avitakkaṁ dhammaṁ paccayā savitakko ca avitakko ca dhammā uppajjanti hetupaccayā—vitakkaṁ paccayā sampayuttakā khandhā cittasamuṭṭhānañca rūpaṁ, vitakkaṁ paccayā sampayuttakā khandhā, mahābhūte paccayā cittasamuṭṭhānaṁ rūpaṁ, vatthuṁ paccayā savitakkā khandhā, mahābhūte paccayā cittasamuṭṭhānaṁ rūpaṁ, vatthuṁ paccayā vitakko sampayuttakā ca khandhā; paṭisandhikkhaṇe …pe…. (Paṭisandhiyāpi pavattisadisāyeva.)