Yassa vā pana yattha rūpāyatanaṁ uppajjittha tassa tattha ghānāyatanaṁ uppajjitthāti? Rūpāvacarānaṁ tesaṁ tattha rūpāyatanaṁ uppajjittha, no ca tesaṁ tattha ghānāyatanaṁ uppajjittha. Kāmāvacarānaṁ tesaṁ tattha rūpāyatanañca uppajjittha ghānāyatanañca uppajjittha. Yassa yattha ghānāyatanaṁ uppajjittha tassa tattha manāyatanaṁ uppajjitthāti? Āmantā. Yassa vā pana yattha manāyatanaṁ uppajjittha tassa tattha ghānāyatanaṁ uppajjitthāti? Rūpāvacarānaṁ arūpāvacarānaṁ tesaṁ tattha manāyatanaṁ uppajjittha, no ca tesaṁ tattha ghānāyatanaṁ uppajjittha. Kāmāvacarānaṁ tesaṁ tattha manāyatanañca uppajjittha ghānāyatanañca uppajjittha. Yassa yattha ghānāyatanaṁ uppajjittha tassa tattha dhammāyatanaṁ uppajjitthāti? Āmantā. Yassa vā pana yattha dhammāyatanaṁ uppajjittha tassa tattha ghānāyatanaṁ uppajjitthāti? Rūpāvacarānaṁ arūpāvacarānaṁ tesaṁ tattha dhammāyatanaṁ uppajjittha, no ca tesaṁ tattha ghānāyatanaṁ uppajjittha. Kāmāvacarānaṁ tesaṁ tattha dhammāyatanañca uppajjittha ghānāyatanañca uppajjittha. (Ghānāyatanamūlakaṁ.) Yassa yattha rūpāyatanaṁ uppajjittha tassa tattha manāyatanaṁ uppajjitthāti? Asaññasattānaṁ tesaṁ tattha rūpāyatanaṁ uppajjittha, no ca tesaṁ tattha manāyatanaṁ uppajjittha. Pañcavokārānaṁ tesaṁ tattha rūpāyatanañca uppajjittha manāyatanañca uppajjittha.