Yassa cakkhāyatanaṁ nirujjhissati tassa ghānāyatanaṁ nirujjhissatīti? Pacchimabhavikānaṁ rūpāvacaraṁ upapajjantānaṁ ye ca rūpāvacaraṁ upapajjitvā parinibbāyissanti tesaṁ cavantānaṁ tesaṁ cakkhāyatanaṁ nirujjhissati, no ca tesaṁ ghānāyatanaṁ nirujjhissati. Itaresaṁ tesaṁ cakkhāyatanañca nirujjhissati ghānāyatanañca nirujjhissati. Yassa vā pana ghānāyatanaṁ nirujjhissati tassa cakkhāyatanaṁ nirujjhissatīti? Āmantā. Yassa cakkhāyatanaṁ nirujjhissati tassa rūpāyatanaṁ nirujjhissatīti? Āmantā. Yassa vā pana rūpāyatanaṁ nirujjhissati tassa cakkhāyatanaṁ nirujjhissatīti? Āmantā. Yassa cakkhāyatanaṁ nirujjhissati tassa manāyatanaṁ …pe… dhammāyatanaṁ nirujjhissatīti? Āmantā. Yassa vā pana dhammāyatanaṁ nirujjhissati tassa cakkhāyatanaṁ nirujjhissatīti? Pacchimabhavikānaṁ arūpaṁ upapajjantānaṁ ye ca arūpaṁ upapajjitvā parinibbāyissanti tesaṁ cavantānaṁ tesaṁ dhammāyatanaṁ nirujjhissati, no ca tesaṁ cakkhāyatanaṁ nirujjhissati. Itaresaṁ tesaṁ dhammāyatanañca nirujjhissati cakkhāyatanañca nirujjhissati. (Cakkhāyatanamūlakaṁ.) Yassa ghānāyatanaṁ nirujjhissati tassa rūpāyatanaṁ nirujjhissatīti? Āmantā. Yassa vā pana rūpāyatanaṁ nirujjhissati tassa ghānāyatanaṁ nirujjhissatīti?