Yo yato diṭṭhānusayaṁ na parijānāti so tato vicikicchānusayaṁ na parijānātīti? Āmantā. Yo vā pana yato vicikicchānusayaṁ na parijānāti so tato diṭṭhānusayaṁ na parijānātīti? Āmantā …pe…. Yo yato vicikicchānusayaṁ na parijānāti so tato bhavarāgānusayaṁ na parijānātīti? Aggamaggasamaṅgī rūpadhātuyā arūpadhātuyā so tato vicikicchānusayaṁ na parijānāti, no ca so tato bhavarāgānusayaṁ na parijānāti. Sveva puggalo kāmadhātuyā tīsu vedanāsu, apariyāpanne so tato vicikicchānusayañca na parijānāti bhavarāgānusayañca na parijānāti. Aggamaggasamaṅgiñca aṭṭhamakañca ṭhapetvā avasesā puggalā sabbattha vicikicchānusayañca na parijānanti bhavarāgānusayañca na parijānanti. Yo vā pana yato bhavarāgānusayaṁ na parijānāti so tato vicikicchānusayaṁ na parijānātīti? Aṭṭhamako kāmadhātuyā tīsu vedanāsu rūpadhātuyā arūpadhātuyā so tato bhavarāgānusayaṁ na parijānāti, no ca so tato vicikicchānusayaṁ na parijānāti. Sveva puggalo apariyāpanne so tato bhavarāgānusayañca na parijānāti vicikicchānusayañca na parijānāti. Aggamaggasamaṅgiñca aṭṭhamakañca ṭhapetvā avasesā puggalā sabbattha bhavarāgānusayañca na parijānanti vicikicchānusayañca na parijānanti. Yo yato vicikicchānusayaṁ na parijānāti so tato avijjānusayaṁ na parijānātīti?