[๓๖๓] ตฺวญฺจ โข มํ ปชานาสิ ยาทิสายํ หยุตฺตโม
ชานนฺโต ชานมาคมฺม น เต ภกฺขามิ กุณฺฑกนฺติ ฯ
กุณฺฑกกุจฺฉิสินฺธวชาตกํ จตุตฺถํ ฯ
____________
๕ สุกชาตกํ
[๓๖๔] ยาว โส มตฺตมญฺญาสิ โภชนสฺมึ วิหงฺคโม
ตาว อทฺธานมาปาทิ มาตรญฺจ อโปสยิ ฯ
[๓๖๕] ยโต จ โข โส ๑ พหุตรํ โภชนํ อชฺฌวาหริ ๒
ตโต ตตฺเถว สํสีทิ อมตฺตญฺญู หิ โส อหุ ฯ
[๓๖๖] ตสฺมา มตฺตญฺญุตา สาธุ โภชนสฺมึ อคิทฺธิตา ๓
อมตฺตญฺญู หิ สีทนฺติ มตฺตญฺญูว ๔ น สีทเรติ ฯ
สุกชาตกํ ปญฺจมํ ฯ
____________
๖ ชรูทปานชาตกํ
[๓๖๗] ชรูทปานํ ขณมานา วาณิชา อุทกตฺถิกา
อชฺฌคฺคํสุ อโยโลหํ ๕ ติปุสีสญฺจ มาณโย
รชตํ ชาตรูปญฺจ มุตฺตา เวฬุริยา พหู ฯ
[๓๖๘] เต จ เตน อสนฺตุฏฺฐา ภิยฺโย ภิยฺโย ขณึสุ เต ๖
ตตฺถปาสีวิโส โฆโร ๗ เตชสี เตชสา หนิ ฯ #๑ ม. อยํ ปาโฐ นตฺถิ ฯ ๒ สี. ยุ. อชฺฌปาหริ ฯ ๓ ม. อคิทฺธตา ฯ ๔ ม. จ ฯ #๕ ม. อชฺฌคมม อยสํ โลหํ ฯ ๖ สี. อขาณิสุ ฯ ม. อขาณิสุํ ฯ ๗ สี. ม. #เต ตตฺถาสีวิโส โฆโร ฯ