สเมตุ มาตรา นาโค สห สพฺเพหิ ญาติภิ ฯ
[๑๕๐๐] มุตฺโตว พนฺธนา นาโค กาสิราเชน เปสิโต ๑
มุหุตฺตํ อสฺสสิตฺวาน ๒ อคมา เยน ปพฺพโต
ตโต โส นิลินํ ๓ คนฺตฺวา สีตํ กุญฺชรเสวิตํ
โสณฺฑาย อุทกมาหิตฺวา มาตรํ อภิสิญฺจถ ฯ
[๑๕๐๑] โกยํ อนริโย เทโว อกาเลน ปวสฺสติ
คโต เม อตฺรโช ปุตฺโต โย มยฺหํ ปริจารโก ฯ
[๑๕๐๒] อุฏฺเฐหิ อมฺม กึ เสสิ อาคโต ตฺยาหมตฺรโช
มุตฺโตมฺหิ กาสิราเชน เวเทเหน ยสสฺสินา ฯ
[๑๕๐๓] จิรํ ชีวตุ โส ราชา กาสีนํ รฏฺฐวฑฺฒโน
โย เม ปุตฺตํ ปโมเจสิ สทา วุฑฺฒาปจายิกนฺติ ฯ
มาตุโปสกชาตกํ ปฐมํ ฯ
____________
๒ ชุณฺหชาตกํ
[๑๕๐๔] สุโณหิ มยฺหํ วจนํ ชนินฺท
อตฺเถน ชุณฺหมฺหิ อิธานุปตฺโต
น พฺราหฺมเณ อทฺธิเก ติฏฺฐมาเน
คนฺตพฺพมาหุ ทฺวิปทานเสฏฺฐ ๔ ฯ
#๑ สี. มุตฺโต ทามาตุ กุญฺชโร ฯ ม. มุตฺตมาทาย กุญฺชโร ฯ ๒ สี. วิสฺสมิตฺวาน ฯ #ม. อสฺสาสยิตฺวา ฯ ๓ สี. ม. นลินึ ฯ ๔ ม. ทฺวิปทินฺท เสฏฺฐ ฯ