เย จ ตํ อนุคิชฺฌนฺติ เต โหนฺติ จกฺกธาริโนติ ฯ
มิตฺตวินฺทุกชาตกํ นวมํ ฯ
___________
๑๐ ปลาสชาตกํ
[๗๙๘] หํโส ปลาสมวจ นิโคฺรโธ สมฺม ชายติ
องฺกสฺมึ เต นิสินฺโนว โส เต มมฺมานิ เฉชฺชติ ๑ ฯ
[๗๙๙] วฑฺฒตาเมว นิโคฺรโธ ปติฏฺฐสฺส ภวามหํ
ยถา ปิตา จ มาตา จ เอวเมโส ๒ ภวิสฺสติ ฯ
[๘๐๐] ยํ ตฺวํ องฺกสฺมึ วฑฺเฒสิ ขีรรุกฺขํ ภยานกํ
อามนฺต โข ตํ คจฺฉาม วุฑฺฒิมสฺส น รุจฺจติ ฯ
[๘๐๑] อิทานิ โข มํ ภายติ ๓ มหาเนรุนิทสฺสนํ
หํสสฺส อนภิญฺญาย มหา เม ภยมาคตํ ฯ
[๘๐๒] น ตสฺส วุฑฺฒิ กุสลปฺปสตฺถา
โย วฑฺฒมาโน ฆสเต ปติฏฺฐํ
ตสฺสูปโรธํ ปริสงฺกมาโน
ปตารยี มูลวธาย ธีโรติ ฯ
ปลาสชาตกํ ทสมํ ฯ
วณฺณาโรหวคฺโค ทุติโย ๔ ฯ
_______________
#๑ ม. เฉจฺฉติ ฯ ๒ ม. เอวํ เม โส ฯ ๓ ม. ภาเยติ ฯ ๔ อิธ ตสฺสุทฺทานํ #ตติยวคฺคาวสาเน สโมหิตํ ฯ