Yasassinaṁ kule jātaṁ, āgataṁ yā na icchati; Socati cirarattāya, vātaggamiva bhaddalīti. Vātaggasindhavajātakaṁ chaṭṭhaṁ. Tikanipāta Padumavagga

7. Kakkaṭakajātaka

“Siṅgīmigo āyatacakkhunetto, Aṭṭhittaco vārisayo alomo; Tenābhibhūto kapaṇaṁ rudāmi, Mā heva maṁ pāṇasamaṁ jaheyya”. “Ayya na taṁ jahissāmi, kuñjaraṁ saṭṭhihāyanaṁ; Pathabyā cāturantāya, suppiyo hosi me tuvaṁ”. “Ye kuḷīrā samuddasmiṁ, gaṅgāya yamunāya ca; Tesaṁ tvaṁ vārijo seṭṭho, muñca rodantiyā patin”ti. Kakkaṭakajātakaṁ sattamaṁ. Tikanipāta Padumavagga

8. Ārāmadūsakajātaka

“Yo ve sabbasametānaṁ, ahuvā seṭṭhasammato; Tassāyaṁ edisī paññā, kimeva itarā pajā”. “Evameva tuvaṁ brahme, anaññāya vinindasi; Kathaṁ mūlaṁ adisvāna, rukkhaṁ jaññā patiṭṭhitaṁ”.