Taṁ negamā jānapadā ca sabbe, Hatthārohā rathikā pattikā ca; Namassamānā pañjalikā upāgamuṁ, “Namatthu te dukkarakārakosī”ti. Jayaddisajātakaṁ tatiyaṁ. Tiṁsanipāta Kiṁchandavagga

4. Chaddantajātaka

“Kiṁ nu socasinuccaṅgi, paṇḍūsi varavaṇṇini; Milāyasi visālakkhi, mālāva parimadditā”. “Dohaḷo me mahārāja, supinantenupajjhagā; Na so sulabharūpova, yādiso mama dohaḷo”. “Ye keci mānusā kāmā, idha lokasmi nandane; Sabbe te pacurā mayhaṁ, ahaṁ te dammi dohaḷaṁ”. “Luddā deva samāyantu, ye keci vijite tava; Etesaṁ ahamakkhissaṁ, yādiso mama dohaḷo”. “Ime te luddakā devi, katahatthā visāradā; Vanaññū ca migaññū ca, mamatthe cattajīvitā”. “Luddaputtā nisāmetha, yāvantettha samāgatā; Chabbisāṇaṁ gajaṁ setaṁ, addasaṁ supine ahaṁ; Tassa dantehi me attho, alābhe natthi jīvitaṁ”.